Şəmkir rayonu Nazim Veysovun qoyub getdiyi problemlərlə baş-başa qalıb. Rayonda keçmiş başçının həll etmədiyi sosial çətinliklər indi yeni rəhbərin ümidinə qalıb. Alimpaşa Məmmədov sələfinin qoyduğu problemləri həll etməlidir.

Şəmkirdən Axar.az-a göndərilən məktubda deyilir ki, ara məhəllələrdə yolların bərbad vəziyyətdə qalması, stadion yaxınlığındakı məcburi köçkünlərin hələ də acınacaqlı şəraitdə yaşaması keçmiş başçının diqqətsizliyinin nəticəsidir.

Yeni başçıdan bu problemlərin həllini gözlədiklərini yazan bir qrup şəmkirli qeyd edir ki, A.Məmmədov rayonu yaxşı tanıyır, burada tikinti işlərinə nəzarət edib deyə, bölgənin problemləri ilə də yaxından tanışdır.

N.Veysovun işdən azad olunmasına gəlincə, yada salaq ki, onun rəhbərliyi dövründə Hesablama Palatasının Milli Məclisə təqdim etdiyi hesabatda RİH-in tabeliyində olan idarə və təşkilatlarda büdcə vəsaitinin düzgün xərclənmədiyi qeyd edilmişdi.

Xatırladaq ki, Azərbaycan Prezidenti İlham Əliyevin sərəncamı ilə, oktyabrın 8-də Şəmkir rayin icra başçısı Nazim Veysov vəzifəsindən azad edilib, onun yerinə Bakı şəhər Vergilər Departamentinin rəisi Alimpaşa Məmmədov təyin olunub.