Son illər Bakı küçələrində süpürgəçilərin ölümü ilə nəticələnən qəzaların sayı durmadan artır. Bunun qarşısını almaq üçün dövlət qurumları səviyyəsində kifayət qədər addım atılıb. Bir müddət əvvəl magistral yolların təmizliyinə cavabdeh olan təmizlik işçilərinə işıqlı jiletlər paylanıldı, daha sonra isə yollara qarşıda süpürgəçinin olduğunu göstərən xəbərdarlıq nişanları vuruldu.

Bundan başqa, avtomobil yollarını təmizləyən süpürgəçilərin yanına iki əlavə şəxs də təhkim edildi ki, onlardan biri süpürgəçiyə yardım edir, digəri isə sürücüləri yol kənarında təmizlik işi getməsilə bağlı məlumatlandırır.

Bütün bu tədbirlərə baxmayaraq, hələ də ölümlə nəticələnən qəzalar baş verir. Səbəb nədir və vəziyyətdən çıxış yolu nədədir? Bu sürücülərin məsuliyyətsizliyidir, yoxsa süpürgəçilərin öz həyatlarına biganəliyi?

Mövzu ilə bağlı Axar.az-a açıqlama verən Bakı Şəhər Baş Dövlət Yol Polisi İdarəsinin ictimaiyyətlə əlaqələr şöbəsinin rəisi, polkovnik Vaqif Əsədov bildirib ki, qəzaların yaranma səbəblərindən birincisi tələblərə uyğun hərəkət edilməməsidir:

“Təkcə kommunal təyinatlı işlər üzrə xidmət aparan əməkdaşların avtomobillərlə vurulması deyil, piyadaların vurulması da bu kateqoriyaya aiddir.

Hadisəyə hüquqi qiymət qəzanın araşdırılmasından sonra veriləcək. Bundan sonra günahkar öz cəzasını alacaq. Artıq səhv etmirəmsə, altıncı belə hadisədir baş verir. Qəzanın baş verməsinə səbəb adətən sürücünün diqqətsizliyi olur. Səhər saatlarında Qara Qarayev prospektində süpürgəçinin ölümü ilə nəticələnən hadisəyə görə cinayət işi qaldırılıb. Bundan sonra da belə hadisələrin qarşısının alınması üçün təsirli tədbirlər görüləcək. Bir daha sürücüləri, hərəkət iştirakçılarını diqqətli olmağa çağırıram”.

Qeyd edək ki, bu gün səhər saatlarında paytaxtın Qara Qarayev prospektində Vurğuz Yavər oğlu Şirinovun idarə etdiyi “Hunday” markalı nəqliyyat vasitəsi yolda təmizlik işləri aparan, 1948-ci il təvəllüdlü Bəsti Dostəli qızı Eyvazovanı vurub.