Bu gün paytaxtın Əhmədli qəsəbəsi ərazisində qeyri-adi hadisə baş verib.

Axar.az xəbər verir ki, yol polisi qaydanı pozan marşurut avtobusu sürücüsünü iş başından ayıraraq özü avtobusu idarə etməyə başlayıb.

Feysbuk sosial şəbəkəsindəki "Sancaq" səhifəsində paylaşılan xəbərdə bildirilir ki, polis sərnişinləri lazımı yerə çatdırıb:

"Bugün çox maraqlı bir hadisə baş verib. Deməli, bir yol polis işçisi Əhmədli ərazisində qaydanı pozan (qırmızı işıqda keçən) 57 nömrəli sərnişin avtobusunu saxlayıb. Sürücünün sənədlərini yoxlayarkən məlum olub ki, sürücünün heç sürücülük vəsiqəsi yoxdur. Sürücü də deyib ki, guya 57 nömrəli marşrutun nəzarətçisi onlara vəsiqəsiz işləməyə icazə verib. Polis də sürücünü uzaqlaşdıraraq, özü avtobusu idarə etməyə başlayıb. Daha sonra polis sərnişinlərə deyib ki, "siz bircə mənə yolu göstərin, hamınızı hara lazımdısa, ora da çatdırcam. Bircə mən gedib çıxım bu avtobusun sonuncu dayanacağına, görüm bunların nəzarətçisi kimdi belə".

Elə də oldu, sərnişinlər yol polisinə yolu göstərdi və hamı rahat şəkildə mənzil başına çatıb. Polis sərnişinlərdən gediş haqqını almayıb".