"Türkiyədən işləmək üçün gətirilən fəhlələr əməkhaqqlarını ala bilməmələri ilə bağlı bizə müraciət etməyib. Əgər müraciət olsa, şikayətlərinə mütləq baxılacaq".

Bu sözləri Axar.az-a Əmək və Əhalinin Sosial Müdafiəsi Nazirliyinin mətbuat xidmətini rəhbəri Elman Babayev Bakı Olimpiya Stadionunun tikintisində iştirak edən türkiyəli fəhlələrin etirazı ilə bağlı danışarkən dedi.

Nazirlik sözçüsü bildirdi ki, bununla bağlı müraciət olunduğu an araşdırmaya başlayacaqlar:

"Türkiyədən gətirilən o fəhlələrin əmək müqaviləsinin olub-olmadığı araşdırılmalı, onların hüquqlarının qorunması istiqamətində addımlar atılmalıdır. Bunun üçünsə fəhlələr nazirliyə müraciət etməlidirlər. Bütün hallarda, artıq bu məsələ diqqətimizdədir".

Qeyd edək ki, Bakı Olimpiya Stadionunun tikintisində iştirak edən fəhlələrin etirazı davam edir. Bu barədə Neftçilərin Hüquqlarını Müdafiə Komitəsinin sədri Mirvari Qəhrəmanlı məlumat yayıb. Etiraz edənlər Türkiyədən gələn 50 nəfər fəhlədir. Onlar Bakı Olimpiya Stadionunun tikintisini reallaşdıran OKR Mühəndislik İnşaat Taahüt Elektrik Enerji Makinə Sanayi Ticarət Limited Şirkətində və ANEL şirkətində (stadionda elektrik, havalandırma və mexaniki işlər görən) çalışırlar. Fəhlələrin 2-3 aydır əməkhaqqı ala bilmədiyi qeyd olunur.