Bakının Binə qəsəbəsinin yolları bərbad vəziyyətdədir.

Axar.az-a şikayət edən qəsəbə camaatı yazır ki, Binədə ictimai nəqliyyatın və yolların vəziyyəti acınacaqlıdır. Marşrut avtobuslarında basabas, səliqəsizlikdən bezən qəsəbə əhli problemin həllini xahiş edir.

"Bu yollardan hər gün gedib-gəlmək işgəncədir. Binə İŞİD-in viran qoyduğu şəhərləri xatırladır. Avtobuslar bərbad vəziyyətdə, içərisi çirkli olur, camaat marşrutda bir-birinin üstünə çıxır, qapılardan sallanmaqla yol gedirlər".

Sakinlər problemi əks etdirən fotoları da redaksiyamıza göndərib. Binəlilər yazır ki, Azərbaycanın ən ucqar dağ kəndlərinə yollar çəkildiyi, ölkədə bu qədər quruculuq getdiyi halda, Binə qəsəbəsinin yolları niyə bu gündə olmalıdır:

"Avtobus tapmaq da zülmdür. Payız-qış aylarında işimiz lap çətinləşir. Xəzər Rayonu İcra Hakimiyyətinə, Nəqliyyat Nazirliyinə müraciət edirik ki, bizim yol və marşrut problemimizi həll etsinlər".