Bakı Olimpiya Stadionunda işləyən fəhlələrin məvacibi ödənilməyə başlanıb.

Axar.az-ın əməkdaşı stadionun tikintisi gedən ərazidə olub və oktyabrın 14-də keçirilən aksiyadan sonrakı vəziyyətlə maraqlanıb. Müxbirimizə bildirilib ki, əmək haqları verilir və gecikdirilmiş maaşlar da ödənilir.

Fəhlələrin sözlərinə görə, onların maaşlarını gecikdirən "OKR Mühendislik İnşaat Taahhüt Elektrik Enerji Makine Sanayi Ticaret Limited" şirkəti olub. Artıq rəhbərlik onlarla görüşəndən sonra problem həllini tapıb.

Fəhlələr söyləyiblər ki, Dövlət Neft Şirkətində və bir çox xarici şirkətlərdə əmək haqqı gecikmələri olmur. Amma bu şirkətdə maaş gecikdirməsi yaşanıb və aksiyadan sonra məsələ həll edilib.

Neftçilərin Hüquqlarını Müdafiə Komitəsinin rəhbəri Mirvari Qəhrəmanlı bir neçə gün öncə qeyd etmişdi ki, fəhlələr maaşların miqdarından, iş şəraitlərindən şikayətlənmirlər. Sadəcə, maaşlarını vaxtlı-vaxtında almaq istəyirlər. Bunu da yerinə yetirmək şirkətin borcudur.

Xatırladaq ki, stadionun may ayına qədər təhvil verilməsi gözlənilir.