Bu gün Dini Qurumlarla İş üzrə Dövlət Komitəsinin təşkilatçılığı ilə “Dini qurumlar və sosial media” mövzusunda konfrans keçirilib.

Axar.az xəbər verir ki, tədbirdə çıxış edən komitə sədri Mübariz Qurbanlı hazırda 909 dini icmanın qeydiyyatdan keçdiyini bildirib:

"Qeydiyyatdan keçənlərin 32-si qeyri-müsəlman, digərləri isə islam dininə aid icmalardır".

Sosial medianın həyatımızın ayrılmaz hissəsinə çevrildiyini deyən M.Qurbanlı vurğulayıb ki, bu məsələdə maarifləndirməyə ehtiyac var:

"Dini icmalar dini maarifləndirmədə yaxından iştirak edir. Dini Qurumlarla İş üzrə Dövlət Komitəsi bu məsələdə Qafqaz Müsəlmanları İdarəsi ilə birlikdə çalışır.

Mətbuatımız da dini maarifləndirmədə yaxından iştirak edir. Bir vaxtlar insanlar fikirlərini qəzetlər vasitəsilə ictimailəşdirirdisə, bu gün onlar bunu sosial şəbəkədə ifadə etməkdə daha çox maraqlıdır. Sosial medianın müsbət tərəfləri ilə yanaşı, mənfi tərəfləri də var. Hətta bəzi ölkələrdə bunu qanunvericiliklə tənzimləyirlər. Bəziləri bunu azad fikrin məhdudlaşması kimi qəbul edir. Lakin danılmaz faktdır ki, sosial mediada bəzən dezinformasiyalar baş alıb gedir. Bu mövzu bizim ölkədə də diqqət mərkəzindədir”.