Paytaxtdakı mağazalarda məşhur kosmetik vasitənin saxta versiyaları satışa çıxarılıb.

Axar.az xəbər verir ki, alıcılıq qabiliyyəti yüksək olan və xanımlar tərəfindən ən çox üstünlük verilən “İngrid Mineral” tonal kreminin saxta versiyaları satılır.

Orijinalından seçilməyən kremlər artıq bir müddətdir satışdadır. Belə ki, işbazlar “Lifting” adlı tonal kremlərin qablaşdırmasının üzərinə “İngrid Mineral” kremlərinin üz qabığının görüntüsünü vurublar. Qablaşdırmanın ikisi də demək olar ki, eyni olduğundan fərq hiss olunmur. Məhsulun üzərinə ustalıqla yapışdırılmış görüntü çıxarıldıqda kremin saxta olduğu məlum olub.

Maraqlıdır ki, kosmetik məhsul satışını həyata keçirən əksər mağazalar da işbazların bu hiyləsindən xəbərdar deyil. Bu səbəbdən bir çox mağazalar orijinal məhsulla bərabər sözügedən məhsulun saxta versiyasını da təqdim edirlər.

Kosmetoloq Könül Quliyevanın sözlərinə görə, saxta kosmetik vasitələrin tərkibində olan xarici faktor və ya qoruyucu maddələr dəridə həssaslıq, qızartı, qaşınma və allergik reaksiyalara səbəb olur və bəzən istehlakçının həyatını təhlükə altında qoyur. Bu səbəbdən istifadəçilər üz üçün kosmetik vasitə seçərkən diqqətli olmalıdırlar.