Yazıçılar Birliyinin üzvü, şair Saday Şəkərli məhkəmə qərarının icrasına nəzarət etməsi üçün Ədliyyə naziri Fikrət Məmmədova müraciət edib.

Bu barədə Axar.az-a şairin hüquqlarını müdafiə edən Səməd Vəkilov məlumat verib. Onun sözlərinə görə, məhkəmənin qanuni qüvvəyə minmiş qətnaməsini icra etməli olan Vüqar Verdiyev vəzifəsini icra etməkdən yayınıb:

"Şirvan Apellyasiya Məhkəməsinin qanuni qüvvəyə minmiş qətnaməsi ilə borclu Yusif Veysəlov Saday Şəkərliyə 100 min ABŞ dolları məbləğində borcunu ödəməlidir. Qətnamə icra olunması üçün borclunun yaşadığı Kürdəmir Rayon İcra Şöbəsinə göndərilib. Orada işə məsul olan icra məmuru Vüqar Verdiyev qətnamənin qüvvəyə minməsindən 3 ay vaxt keçməsinə baxmayaraq, onun icrası ilə bağlı heç bir tədbir görməyib".

Hüquq müdafiəçisi icra məmurunun səhlənkarlığı nəticəsində Y.Veyslovun ölkəni tərk edərək xaricə qaçdığını bildirib:

"İcra məmuru Vüqar verdiyev borclunun ölkəyə giriş-çıxışına məhdudiyyət qoymalı olduğu halda qəsdən bu tədbiri gecikdirib. Bununla da Yusif Veysəlovun xaricə qaşmasına şərait yaradıb".

S.Vəkilov bu səbəbdən ədliyyə naziri Fikrət Məmmədova müraciət edərək Saday Şəkərlinin pul tələbinə dair icra işini nəzarətə götürməsini xahiş edib:

"Konstitusiyaya görə, məhkəmənin qəbul etdiyi qərarlar dövlətin adından çıxarılır və onların icrası məcburidir".

Xatırladaq ki, şairlə əvvəllər dostluq edən Yusif Veysəlov iş qurmaq adı adı ilə ondan 150 min dollar pul alıb. Sonradan onu aldatdığını anlayan S.Şəkərli pulunu geri ala bilmədiyi üçün məhkəməyə müraciət edib. Şirvan Apellyasiya Məhkəməsi isə borcun 100 min dollar olduğunu tanıyıb və bu barədə qətnamə qəbul edib. Lakin şair hələ də pulunu geri ala bilməyib.