Azərbaycan və Türkmənistan arasında Xəzər dənizinin dibi ilə fiber-optik kabel magistralının çəkilməsi çox əhəmiyyətli bir məsələdir.

Axar.az xəbər verir ki, bu sözləri Azərbaycan İnternet Forumunun prezidenti Osman Gündüz deyib. O bildirib ki, bunun Azərbaycan üçün çox böyük faydası var:

“Bu regionun bazarında telekommunikasiya xidmətləri ilə əlaqəli uzun müddətdir ki, böyük dövlətlərin ( Rusiya, Çin və s.) maraqları da var. Məhz həm də bu səbəbdən BMT-nin 3 dəstək qətnaməsi olmasına baxmayaraq, 10 ildir ki, TASİM reallaşa bilmir. Hətta bir müddət tam unudulmuşdu. Son dövrlərdə bu sahədə bir qədər fəallıq olsa da, heç bir konkret irəliləyiş əldə olunmayıb. Əvvəllər də bu istiqamətdə cəhdlər olub və uğursuz nəticələnib”.

O.Gündüz qeyd edib ki, birdən-birə Türkmənistana doğru magistralın çəkilməsi və hətta oradan da Əfqanıstana internet sata biləcəyimizlə bağlı məsələnin yenidən gündəmə gəlməsi çox maraqlıdır:

“Yeri gəlmişkən, bizim 2 magistral provayderimiz də bu regiona telekommunikasiya və internet xidmətləri çıxarmaqda çox maraqlıydı və bu istiqamətdə konkret işlər və nəticələr də ortada var”.