"Elektron hökumət portalı ilə bağlı prezident fərmanları və hökumətin qərarları olmasına baxmayaraq, hələ də icra yoxdur".

Axar.az xəbər verir ki, söz sözləri "Multimedia" İnformasiya Sistemləri Texnologiyaları Mərkəzinin direktoru, Azərbaycan İnternet Forumunun prezidenti Osman Gündüz öz Feysbuk hesabında yazıb.

O qeyd edib ki, elektron hökumət portalında heç bir yenilik aparılmır:

"Elektron hökumət portalını analiz edəndə diqqəti cəlb edən məqamlardan biri də ondan ibarətdir ki, uzun müddətdən bəri "Təsdiq olunan xidmətlər siyahısından qurumun öz saytında olanlar" parametri dəyişmək bilmir. Bu isə o deməkdir ki, hökumət tərəfindən təsdiq edilən və sayı təxminən 450 olan xidmətlərdən təxminən 80 xidmət hələ də elektron formaya keçirilmir. Yəni, əslində, təsdiqlənən xidmətlərin elektron formaya keçirilməsi, portala inteqrasiyası ilə bağlı prezident fərmanları və hökumətin qərarları olmasına baxmayaraq, icra yoxdur. Nə Vətəndaşlara Xidmət və Sosial İnnovasiyalar Dövlət Agentliyi, nə də Rabitə və Yüksək Texnologiyalar Nazirliyi bununla bağlı hər hansı açıqlama verir. Sanki aidiyyəti qurumlar da bununla barışıblar".