Kəpəz TV noyabrın 7-də Şəmkirdə evinə silahlı basqın olan və xəsarət alanların fotolarını yayıb. Yaralılardan 4-ü Şəmkir Rayon Mərkəzi Xəstəxanasına yerləşdirilib.

Axar.az xəbər verir ki, silahlı şəxslər hələ məsuliyyətə cəlb olunmayıb və onların tapılması istiqamətində Şəmkir Rayon Polis Şöbəsində əməliyyat-axtarış tədbirləri həyata keçirilir. Əldə etdiyimiz son xəbərə görə, ailənin Rusiyada işləyən övladı evə pul göndərib və bundan agah olan qruplaşma evə hücum təşkil edib.
Maska taxmış, odlu və soyuq silahlarla silahlanmış 4 nəfər 1958-ci il təvəllüdlü Hüseyn Səfərovun evinə basqın edib. Evdən 6600 manat, 1 milyon rus rublu və xeyli qızıl-zinət əşyaları aparılıb. Eyni zamanda, H.Səfərovun həyat yoldaşı, 62 yaşlı Ağgül Səfərovaya, oğlu, 32 yaşlı Ruslan Səfərova və gəlini, 23 yaşlı Röyalə Səfərovaya soyuq silahla bədən xəsarətləri yetirilib.

Həmçinin evə qonaq gəlmiş Gədəbəy rayon sakini, 61 yaşlı Qətibə adlı qadın da hücuma məruz qalıb.