Bakıda "Dobromed" klinikasının fəaliyyətini dayandırması bir çox suallar doğurub. Klinikanın qəfil bağlanması və rəhbərliyin bunun səbəblərini incəliyi ilə aydınlaşdırmaması qeyri-müəyyən vəziyyət yaradıb.

Axar.az-a verilən məlumata görə, klinikanın fəaliyyətini davam etdirəcəyi sual altındadır və lisenziya alınması üçün müzakirələr gedir. Danışıqlarda əsas tələb klinikanın ginekoloji şöbəsində baş verən neqativ halları aradan qaldırmaqdır.

Bəzi iddialara görə, "Dobromed"in bu şöbəsində texniki təchizat aşağı səviyyədə olub, şərait və antisanitariya normaları standartlara cavab verməyib. O da bildirilir ki, Səhiyyə Nazirliyi klinikada doğuş əməliyyatları ilə bağlı nöqsanlar aşkarlayıb ki, bu da bağışlanmaz xəta kimi qəbul edilib.

***

Klinikanın iqtisadi məsələlər üzrə direktoru Solmaz Əliyeva da tibb ocağının fəaliyyətinin dayandırılmasına səbəb kimi xəstəxananın ginekologiya şöbəsində müəyyən çatışmazlıqlar olduğunu göstərib.

Səhiyyə Nazirliyinin mətbuat xidmətinin rəhbəri Anar Qədirli isə bildirib ki, qüsurlar aradan qaldırılana qədər klinikaya verilən lisenziya dayandırılacaq: "İndi klinikada qüsurlar aradan qaldırılandan sonra yenidən Səhiyyə Nazirliyinə müraciət edə bilərlər. Müraciət əsasında yenidən komissiya təşkil olunacaq. Yoxlamalarda qüsur aşkar olunmasa, o zaman klinikaya lisenziya verilə bilər".

A.Qədirli əlavə olaraq Azxeber.com-a danışıb: "Klinikanın ginekoloji şöbəsində ölüm hadisəsi baş verdiyi doğru məlumat deyil. Ginekologiya şöbəsində hər hansı bir problemin yaşanması məhz ölüm hadisəsinin olması demək deyil. Əgər bu cür hal yaşansaydı, müvəqqəti olaraq deyil, daimi olaraq bu klinikanın fəaliyyəti dayandırılardı".