Bakının Binə qəsəbəsində yolların asfaltlanmasına başlanılıb.

Bu barədə qəsəbədən Axar.az-a verilən məlumata görə, bərbad vəziyyətdə olan Binənin yolları artıq təmir olunur. Sakinlər xəbər verir ki, noyabrın 8-də olan mitinqdən sonra Nəqliyyat Nazirliyi hərəkətə keçib. Hazırda Binədə mitinq keçirilən ərazidə yollar düzəldilir.

Bununla belə, Binə camaatı ara yolların, məhəllələrin təmir edilmədiyini deyərək gileylənirlər. Onların dediyinə görə, hələ də ara məhəllələr acınacaqlı vəziyyətdədir; palçıq dizə çıxıb, kələ-kötür, çala-çuxur yollardan keçmək əzabı bitməyib. Buna görə də marşrutlar ara yollardan keçmirlər. Sakinlər Binə yollarının tamamilə asfaltlanmasını istəyirlər.

Xatırladaq ki, Binə-Hövsan avtomobil yolunu bağlamağa cəhd göstərənlərdən 4 nəfər barəsində cinayət işi qaldırılıb. 11 nəfər barəsində isə inzibati həbs tədbiri seçilib.

DİN-in rəsmi saytında yayılan məlumatda bildirilir ki, noyabrın 8-də səhər saatlarında 160-170 Binə sakini yolu bağlamağa cəhd göstərib. "Cəhdin qarşısı alınarkən onlardan bir qrupu polisin haqlı tələblərinə tabe olmayaraq daş atıb, Post-Patrul Xidməti Bölüyünün əməkdaşları, polis serjantları Xankişi Quliyevə, Elvin Ramazanova, polis kiçik serjantları Samir Bayramova və Zöhrab Hacıyevə xəsarət yetiriblər. "Fiat-Doblo" markalı iki xidməti avtomobilə ziyan vurulub".