Bakıda fantastik qiymətə avtomobil qarajları satışa çıxarılıb. Özü də bir mənzilin qiymətinə, düz 60 min manata.

Xüsusi ilə də yeni tikilən binalardan mənzil alan sakinlər sonradan avtomobilləri üçün qaraj da almalı olurlar.

Xəzər Xəbər-in məlumatına görə, ekspertlər hesab edir ki, qiymətlərin belə yüksək olması tələbatın çox olması ilə bağlıdır. Avtomobili olan sakinlər ya birdəfəlik ödənişlə qaraj almağa məcbur olurlar, ya da aylıq müəyyən məbləğ qarşılığında bu xidmətdən istifadə edirlər.

Üstəlik qarajlar üçün Dövlət Reyestr Xidmətindən çıxarış nəzərdə tutulmadığından mülkiyyət hüququ daşımır. Əmlak üzrə ekspert Nofəl Quliyevin sözlərinə görə, belə olan halda isə gələcəkdə vətəndaş problemlə üzləşə bilər.

Ekspertin sözlərinə görə, əksər xarici ölkələrdə mənzil alan sakin həm də qaraja sahib olur. Bizdə isə bu hala çox az rast gəlinir. Ona görə də qarajların da xüsusiləşdirilməsinə ehtiyac var.