Azərbaycan Dillər Universitetinin (ADU) rektoru, akademik Kamal Abdulla Venesuelanın xarici işlər nazirinin Asiya, Yaxın Şərq, Okeaniya üzrə müavini Ruben Dario Molina ilə görüşüb.

Kult.az xəbər verir ki, K.Abdulla Venesuelada baş verən xoşagəlməz hadisələrə görə məyusluğunu ifadə edib və bu çətin vəziyyətdən ölkənin məsuliyyətlə, ləyaqətlə çıxacağına inandığını deyib.

Azərbaycanın Cənubi Qafqaz regionunda Venesuelanın sadiq dostlarından biri olduğunu söyləyən rektor dil və mədəniyyətlərin öyrənilməsi istiqamətində Azərbaycan və Venesuela arasındakı əlaqələrin inkişaf etdirilməsi məqsədilə Müştərək komissiyanın yaradılması ideyasından söz açıb.

Rektor ADU-da həyata keçirilən “Səfir saatı” layihəsi haqqında məlumat verərək universitetin müəllim və tələbələri ilə görüşmək üçün qonağı layihədə iştirak etməyə dəvət edib.

Daha sonra R.D. Molina səmimi qəbula görə təşəkkürünü bildirərək, ikitərəfli və beynəlxalq əlaqələrin qurulmasında akademik mühitin vacib olduğunu söyləyib. Qonaq xalqların tarixi və mədəniyyət arasında əlaqələrin qurulması üçün dillərin öyrənilməsinin əhəmiyyətindən söz açıb.

Daha sonra qarşılıqlı əməkdaşlıq, tələbə və müəllimlərin təkmilləşməsi istiqamətində aparılacaq işlər, birgə layihələr və gələcək perspektivlər müzakirə olunub.

Qeyd edək ki, görüşdə Venesuelanın ölkəmizdəki ilk fövqəladə və səlahiyyətli səfiri Kristofer Berroteran da iştirak edib.