Azərbaycan Dillər Universitetinin (ADU) rektoru, akademik Kamal Abdulla ABŞ-ın ölkəmizə yeni təyin olunmuş fövqəladə və səlahiyyətli səfiri Örl Litzenbergerlə görüşüb.

Axar.az xəbər verir ki, səfiri yeni təyinatı münasibəti ilə təbrik edən rektor Azərbaycan və ABŞ arasında olan yüksək səviyyəli ikitərəfli münasibətlər haqqında danışıb.

Azərbaycanın çoxmillətli ölkə olduğunu deyən rektor multikulturalizm siyasətinin ölkəmizdə uğurla həyata keçirildiyini vurğulayıb.

ADU-nun rektoru ABŞ səfirinə universitetdə fəaliyyət göstərən “Səfir saatı” layihəsi haqqında məlumat verib. Ölkəmizdə fəaliyyət göstərən diplomatların “Səfir saatı” layihəsi çərçivəsində tələbələrlə görüşünü uğurlu təcrübə kimi dəyərləndirən Kamal Abdulla diplomatı mühazirə deməyə dəvət edib.

Örl Litzenberger səmimi qəbula görə təşəkkürünü bildirib:

“Azərbaycan məndə olduqca xoş təəssürat yaradıb. Azərbaycanlıların qonaqpərvərliyinə heyran olmuşam. Sizinlə – tanınmış elm xadimi və yazıçı ilə şəxsən tanış olmaq fürsətindən şərəf duyuram. Bu görüşümüz Azərbaycan dilini öyrənmək həvəsimi bir qədər də gücləndirdi. Sizə və kollektivinizə minnətdaram ki, Bakı Amerika Mərkəzinə qucaq açmısınız. Bu, mənim və ölkəm üçün çox dəyərlidir”.

Səfir əlavə edib ki, diplomatik fəaliyyətində tələbə mübadiləsini gücləndirməyə, mübadilə proqramlarını inkişaf etdirməyə xüsusi diqqət göstərəcək.