Piyada səkisinin asfaltlanması zamanı gövdəsinin ətrafı da tam olaraq asfaltlanan ağacların ətrafı təmizlənib.

Ekologiya və Təbii Sərvətlər Nazirliyindən Axar.az-a verilən məlumata görə, daxil olmuş şikayətlə bağlı tədbir görülüb. Belə ki, Yasamal rayonu Hüseyn Cavid prospektində piyada səkilərinə təmirlə əlaqədar asfalt örtük döşənib. Bu zaman səkidə olan ağaclar nəzərə alınmayıb. Bir çox ağacın gövdəsinin ətrafı tamamilə asfaltlanıb. Ağacların su içə bilməsi üçün belə torpaq məsafəsi buraxılmayıb.

Problemlə əlaqədar olaraq Ekologiya və Təbii Sərvətlər Nazirliyinin əməkdaşları ərazidə olublar. Nazirlik əməkdaşları ağacların dibini təmizləyərək asfalt qatını ağacların gövdəsindən ayırıblar.