"Stadion "Qarabağ" – "İnter" matçını qəbul etməyə hazırdır".

Bu sözləri apasport.az-a açıqlamasında Tofiq Bəhramov adına Respublika stadionunun direktoru Akif İsmayılov deyib.

Avroliqanın "Dnepr"lə Bakıda keçirilən oyununda stadionun qapısı "Qarabağ"ın azyaşlı azarkeşinin üstünə aşmışdı. Nəticədə kəllə-beyin travması alan və ayağı əzilən azarkeş əməliyyat olunmuşdu.

İsmayılovun sözlərinə görə, "Dnepr"lə matçdakı xoşagəlməz olay bu dəfə yaşanmayacaq. O, eyni zamanda azarkeşlərə müraciət də edib: "Hər şey nəzərdən keçirilib, heç bir problem yoxdu. Əslində, keçən oyunda da təhlükəsizliklə bağlı problem yox idi. Sadəcə, iş idi də, gəldi başımıza. Biz də bunu istəməzdik. Mən sizin vasitənizlə azarkeşlərə müraciət edirəm ki, qapılar 18:30-dan etibarən açılacaq. Yəni, bir az tez gəlsinlər. Bizdə adətən 9-un yarısında 20 min adam gəlir stadiona. Bu isə sıxlıq yaradır. Mən başa düşürəm ki, hava soyuqdu. Üstəlik, sağ olsunlar, "Qarabağ"a dəstək olurlar. Amma bir az tez gəlmək lazımdı. UEFA-nın tələblərinə uyğun olaraq, bu oyunda da qapılar bağlanmayacaq. "Dnepr"lə matçdakı hadisə bu dəfə yaşanmayacaq".

İsmayılov stadionun ot örtüyünün də durumunun yaxşı olduğunu bildirib: "Qazonun da vəziyyəti idealdı. Arenanı bütünlüklə baxışdan keçirmişik. Narahat olmağa dəyməz".