O aksiyaları keçirənlər Azərbaycana düşmən mövqeyində dayananların dəyirmanına su tökür və özləri də bu xalqın nümayəndəsi olmaq şərəfindən məhrum olur.

Bu sözləri Axar.az-a açıqlamasında millət vəkili Musa Quliyev mayın 13-də Brüsseldə 3-4 nəfər antimilli ünsürün aksiya həyata keçirmək cəhdi barədə danışarkən deyib.

O bildirib ki, belə addımlar təkcə Azərbaycan hökumətinə qarşı deyil, bütövlükdə Azərbaycan xalqına qarşı atılan xain addımdır:

“Biz belə hadisələri zaman-zaman görürük. Xüsusilə sosial şəbəkələrdə müxtəlif şəxslərin tapşırığı ilə Azərbaycan əleyhinə təbliğatlar aparırlar. O şəxslərin ermənilərdən heç bir fərqi yoxdur. Bu insanların xain hərəkətləri ölkəmizin Avropa Birliyi ilə əlaqələrinə mənfi təsir göstərə bilməz. Sadəcə, bu hadisə bir daha göstərir ki, onlar Azərbaycana düşmən olan qüvvələrin əlində oyuncağa çevrilib, şərəf və ləyaqətlərini itiriblər. Onların bu hərəkətləri düşmən qüvvələrinin sifarişi ilə həyata keçirməsi xalqımıza da məlumdur. Xalq hər şeyi görür və anlayır.

Azərbaycanda son illər gedən sosial, iqtisadi inkişaf və ölkəmizin Avropada qazandığı nüfuz belə ermənipərəst, satılmış insanları qıcıqlandırır. Bu günlər keçirilən Şərq Tərəfdaşlığı sammitində Azərbaycan yeni bir müstəviyə qədəm qoydu. Hesab edirəm ki, bundan sonra ölkəmizin Avropa Birliyinə inteqrasiyası daha da sürətlənəcək və iqtisadi, siyasi əlaqələrimiz artacaq”.