Lənkəranda 1 saylı ərazi üzrə ekologiya təbii sərvətlər şöbəsinin sektor müdiri Bəxtiyar Hüseynovdan şikayət var.

Bir qrup sahibkarın Axar.az-a göndərdiyi şikayət məktubunda deyilir ki, şöbə müdiri Bəxtiyar Hüseynov iş adamlarını yaşıllıqları məhv etməkdə günahlandırıb tək-tək qanunsuz şəkildə cərimələyir.

Sahibkarların sözlərinə görə, B.Hüseynov rayonun Şəhidlər Xiyabanı küçəsində gizli çəkiliş aparır və ərazidə yaşıllıqların kəsildiyini, yerində tikinti işləri aparıldığını əsas gətirərək nazirliyə şikayət yazıb göndərir.

Obyekt sahibləri isə qeyd edirlər ki, onlar ərazidə yaşıllığa heç bir ziyan verməyiblər və tikinti işləri aparılması haqda İcra Hakimiyyətindən rəsmi sərəncam əldə ediblər. Üstəlik, yeni yaşıllıq salınması üçün ağaclar da əkiblər, abadlıq işləri görüblər. B.Hüseynov isə sahibkarlardan qeyri-rəsmi haqq tələb edir.

Bildirək ki, rayonun magistral yollarında, parklarında və küçələrində əsasən dəmir ağacı, şabalıd yarpaq palıd, ağcaqayın, qızılağac, göyrüş və bu kimi həmişəyaşıl ağaclar əkilir. Ötən il Lənkəran meşə mühafizəsi və bərpası müəssisəsi tərəfindən 190 hektar ərazidə yeni meşələr salınıb.