17:14

Ermənilər növbəti dəfə Azərbaycan mediasını hədəfə alan təxribata əl atıb.

Axar.az xəbər verir ki, bu dəfə ermənilər “Haqqinaz.com” adlı (rus dilində) yeni sayt yaradaraq, Azərbaycanla bağlı təxribaçı materiallar dərc etməyə başlayıblar.

Saytın adının tanınmış jurnalist Eynulla Fətullayevə məxsus “Haqqin.az”dan götürüldüyü şübhə doğurmur. Saytın dizaynı da “Haqqin.az”a uyğunlaşdırılıb.

Saytın Ermənistan domenindən (“am”) istifadə etmədən fəaliyyəti, üstəlik “Haqqinaz” olaraq tanınmasına cəhd bu portalın Azərbaycana məxsus olması haqda yanlış rəyin yaradılmasına hesablanıb. Ermənilər guya Azərbaycan saytında belə materialların yayıldığını nümayiş etdirmək istəyirlər. Bu saytın yaydığı materialdan daha sonra erməni mediasının “Azərbaycan saytına istinad” kimi sui-istifadə etməsi də istisna deyil.

Saytın rekvizitində də ünvan göstərilməyib və müəllif hüquqlarının “Haqqinaz”a aid olduğu qeyd edilib.

***

Məsələ ilə bağlı "Haqqin.az" saytının təsisçisi və baş redaktoru Eynulla Fətullayev Axar.az-a açıqlamasında bildirib ki, bu, ilk təşəbbüs deyil. Bir neçə ildir Ermənistanda bu cür saytlar fəaliyyət göstərir.