"ATƏT-in Minsk Qrupunun təmsilçiləri fəaliyyət göstərdikləri bu illər ərzində ilk dəfədir ki, mövcud olduğu formatdan kənara çıxır və danışıqlara yeni dövləti cəlb etməyə çalışır".

Bu sözləri Axar.az-a açıqlamasında millət vəkili Zahid Oruc ATƏT-in Minsk Qrupu həmsədrlərinin Almaniyaya gözlənilməz səfərini şərh edərkən deyib. Onun sözlərinə görə, Almaniyanın Cənubi Qafqazdakı maraqları Fransadan daha böyükdür:

"Bununla belə, məsələyə sırf Avropa Birliyinin mənafeləri baxımından yanaşdıqda, burada heç bir dövlətə əlahiddə üstünlük verməyə dəyməz. Çünki ABŞ-ın Qarabağ siyasətini bölüşməyən dövlətin Qərbin adından çıxış edərək Minsk Qrupuna qoşulması qeyri-mümkündür. Ukrayna ətrafındakı hadisələr göstərdi ki, Almaniya postsovet məkanında baş verən münaqişələrin həllində effektli rol oynaya bilər. Lakin onların təkbaşına hərəkət etmək səlahiyyəti olmadığından, üstəlik də bu ölkə bütün resurslarını tənzimləməyə cəlb etmədiyindən, hər hansı uğurlu təcrübədən danışmaq mümkün deyil. Ona görə Qarabağ danışıqlarına təsir göstərən amillərdən biri kimi Rusiya-Ukrayna konfliktinin hansı formada nəticələnməsi bizim üçün çox əhəmiyyətlidir".

Millət vəkili bütün hallarda, həmsədrlərin Berlinə getməsinin məqsədinin müəmmalı olduğunu bildirdi:

"Yaxın günlərdə Xarici İşlər Nazirliyinin məsələyə dilomatik konfidensiallığı gözləmək şərtilə müəyyən açıqlama verəcəyinə inanıram. Təəssüf ki, hazırda ticari embarqoların tüğyan elədiyi beynəlxalq şəraitdə Qarabağa görə Türkiyədən başqa heç bir dövlət Ermənistana sanksiyalar tətbiq etmək niyyətində deyil. Ona görə Berlin danışıqlarına fövqəladə önəm verməyə heç bir ehtiyac yoxdur".