Bu açıqlamanı dilə gətirən şəxsin zəkasına şübhə edirəm. Bunu deyən şəxs böyük yanlışlığa yol verib. Farscanı yetəri qədər bilməklə insanın qabiliyyəti arasında heç bir əlaqə yoxdur.

Axar.az xəbər verir ki, bu sözləri Təbrizin İran parlamentindəki millət vəkili Məhəmməd İsmail Səidi İran Təhsil Nazirliyinin irqçi “farsca yetərlilik testi” planına münasibət bildirərkən deyib.

“İranda fərqli qövmlər və dillər var. Azərbaycanda elə istedadlı şəxslər var ki, onların bəziləri fars dilini yaxşı bilmir. Məsələn, bir azərbaycanlı həyatı boyu valideyni ilə türk dilində danışır. Belə bir mühitdə fars dilini yetəri qədər bilmək planından danışmaq mənasızdır. Belə açıqlamaların türk dili kimi zəngin ədəbiyyata zərbə vurmasına imkan vermək olmaz. Hiss olunur ki, bəzilər qövmlərin hissiyyatından sui-istifadə etmək istəyir” - M.İ.Səidi bildirib.

Qeyd edək ki, İran təhsil nazirinin ibtidai təhsil üzrə müavini Rizvan Həkimzadə mayın 29-da “farsca yetərlilik testi”ni məktəbə daxil olmaq istəyən uşaqların sağlamlığının testi layihəsinə əlavə edilə biləcəyi barədə açıqlama verib.

Məşhəd Universitetinin müəllimi Seyid Məhəmmədbaqir Təbatəbayi isə bildirmişdi ki, İranda valideynlər uşaqlarına məktəbdən əvvəl fars dilini öyrətmirsə, deməli, onların uşaq tərbiyə etmək qabiliyyətləri yoxdur və bu uşaqları valideynlərindən almaq lazımdır.