"Bizim binaların liftlərinə nəzarət olunmur. Yeni binalar olsa da, liftlər sanki istismar dövrünü başa vurub. Natəmizlik, nasazılıqdir, kimin əlində nə tullantı, siqaret kötüyü varsa, liftin içinə atır. Mütləq liftlərə təhlükəsizlik kameraları yerləşdirilməlidir və inzibati cəza, ya da cərimə müəyyən edilməlidir".

Bu sözlərlə "Akkord" şirkətinin "Uğur-2" yaşayış kompleksində yaşayan bir qrup sakin Axar.az-a şikayət məktubu yazıb. Bakıxanov qəsəbəsi, Y.Əliyev küçəsindəki yaşayış kompleksinin sakinləri məktubda qeyd edirlər ki, blokların girişinə kodlu qapılar qoyulmalıdır, liftlərə təhlükəsizlik kameraları yerləşdirilməlidir, qurğular yenidən təmir edilməlidir.

Sakinlərin sözlərinə görə, liftlərdə də nasazlıq var:

"Düymələr normal işləmir, yeni binalarda belə lift olarmı heç! Elə bil, 40 ilin liftləridir. Axı hər cür şəraiti olan binaların liftləri niyə bu günə salınmalıdır? Çox xahiş edirik ki, şirkət rəhbərliyi və məsul şəxslər müvafiq tədbirlər görsün".