Azərbaycan Dillər Universitetində (ADU) GUAM+B ölkələrinin 6-cı Beynəlxalq Yapon dili Natiqlik Müsabiqəsi keçirilib.

ADU-dan Axar.az-a verilən məlumata görə, müsabiqə beş dövlətin – Gürcüstan, Ukrayna, Moldova, Belarus və Azərbaycanın iştirakı ilə təşkil edilib.

Hər il Yapon Fondu tərəfindən dəstəklənən və Azərbaycanda ikinci dəfə keçirilən bu müsabiqədə 4 tələbə təmsil edib ki, onların da 2-si ADU-nun Beynəlxalq münasibətlər və İdarəetmə fakültəsinin tələbələri Lalə Bağırova və İlahə Məmmədova olub. Lalə Bağırova 2-ci, İlahə Məmmədova isə 3-cü yerə layiq görülüb.

Sonda isə Universitetin rektoru, Xalq yazıçısı, akademik Kamal Abdulla və Yaponiyanın Azərbaycandakı Fövqəladə və səlahiyyətli səfiri Katori Teriyuki çıxış edərək, tədbirin əhəmiyyətini yüksək qiymətləndiriblər.

GUAM+B ölkələrinin 7-ci Beynəlxalq Yapon dili Natiqlik Müsabiqəsinin Moldovada keçirilməsi yekdilliklə qəbul olunub.