Bu yay bölgələrdə leysan xarakterli yağıntıların çox olması müşahidə edilib. Buna baxmayaraq, paytaxtımıza demək olar ki, yağış yağmır, yalnız küləkli hava şəraiti hökm sürüb.

Bu cür hava şəraitinin Bakı üçün nə dərəcədə xarakterik olub-olmaması barədə Axar.az-a danışan Ekoloq Jurnalistlər Birliyinin sədri Cəmşid Quliyev bildirib ki, Bakının iqlimi rayonlarımızın iqlimindən fərqlənir.

“Son illər Yer kürəsində iqlim dəyişiklikləri baş verir. Bunların hamısı qlobal problemlərlə əlaqədardır. Bunu yalnız Azərbaycanla, Bakı ilə əlaqələndirmək doğru olmaz. Azərbaycanın iqlim şəraitini daha çox ətraf regionların iqlimi müəyyən edir. Bakıda əsasən Xəzər dənizindən, şərqdən gələn hava kütlələri hökm sürür. Xəzər dənizi sahilindəki regionların hava şəraitinə şimal iqlimi və eyni zamanda cənub iqlimi təsir edir. Qərb bölgələrimizə isə Qara dənizin subtropik iqlimi müəyyən dərəcədə təsir edir. Burada digər hallarda isə yarımsəhra iqlimi hökm sürür”, - ekspert bildirib.

C.Quliyev ölkəmizdə şimal iqliminin təsirinin zəif olmasının səbəbinin Böyük Qafqaz sıra dağlarının Azərbaycanın əsas hissəsini şimal iqliminin təsirindən müəyyən qədər mühafizə etməsi ilə əlaqədar olduğunu bildirib.