10:34

Bərdə rayonunun mərkəzində yerləşən ticarət obyektlərindən birində yanğın baş verib.

FHN-nin mətbuat xidmətindən Axar.az-a verilən məlumata görə, rayonun Üzeyir Hacıbəyov küçəsində ümumi sahəsi 2000 m² olan, bir dam altında bir-birinə bitişik tikilən, müxtəlif təyinatlı obyektlərin (qalayçı sexi və mebel mağazaları) yanar konstruksiyaları 590 m² sahədə yanıb.

Tikililərin qalan hissəsi və yaxınlıqdakı məktəb binası yanğından mühafizə olunub.

Yanğın yanğından mühafizə bölmələri tərəfindən söndürülüb.

Report "Köhnə bazar" adlanan ərazidə yanğında qalayçı dükanı, mebel və məişət avadanlıqları satılan ümumilikdə 12 mağazanın yandığını yazıb. Gecə 3 radələrində başlayan yanğından sahibkarlar səhər saatlarında xəbər tutublar. Yanğının elektrik naqillərindəki qısaqapanmadan baş verdiyi ehtimal olunur.

Hadisə zamanı FHN-in bir əməkdaşını cərəyan vurub. Vəziyyəti ağır olan həmin şəxsin nitqi tutulub. Hazırda şəxsiyyəti məlum olmayan FHN əməkdaşı xəstəxanaya yerləşdirilib.

Faktla bağlı araşdırma aparılır.