ABŞ-ın Hərbi Dəniz Sistemləri Komandanlığı VSE korporasiyası ilə 10 082 812 dollar həcmində müqavilə imzalayıb.

Axar.az xəbər verir ki, bu məlumatı “Hstoday.us” saytı yayıb. Müqaviləyə əsasən, VSE Azərbaycana antiterror və əks-kəşfiyyat qurğuları çatdırmalı, eləcə də Xəzər dənizində Azərbaycanın dəniz təhlükəsizliyi proqramına dəstək üçün ölkə daxilində təlimlər keçirməlidir.

Məlumatda həmçinin tərəflər arasında müqavilənin Azərbaycan hökuməti üçün Xarici Hərbi Satış proqramı çərçivəsində nəzərdə tutulduğu bildirilib. Müqavilədə nəzərdə tutulan işlərin 88%-nin Virciniyada, 12%-nin isə Azərbaycanda icra ediləcəyi və onun 2020-ci ilin sentyabrına qədər bitiriləcəyi vurğulanıb.

Qeyd edək ki, bundan öncə erməni hərbi ekspert Suren Sərkisyan Azərbaycanın ABŞ-la əlaqələrdə yüksək nəticələr əldə etdiyini, bunun nəticəsində hərbi yardımlar aldığını, İrəvanın isə “yatdığını” açıqlamışdı.