Qəbələdə ayı əti satmaq istəyən şəxs cəzalandırılıb.

Ekologiya və Təbii Sərvətlər Nazirliyindən Axar.az-a verilən məlumata görə, 6 saylı Regional Ekologiya və Təbii Sərvətlər İdarəsinə Qəbələ rayonu Soltanmuxa kəndi yaxınlığında ayı ətinin satılması ilə bağlı məlıumat daxil olub.

Araşdırma zamanı VAZ-2106 markalı 36 BL 273 dövlət nömrə nişanlı avtomobilin yük yerində ət aşkar edilib və mütəxəssislər tərəfindən ayı əti olduğu təsdiqlənib. Avtomobilin sahibi Qəbələ rayonu Tikanlı kənd sakini Səyahət Şəfiyev barəsində akt tərtib olunub.

Məsələyə hüquqi qiymət verilməsi və qanunamüvafiq tədbirlərin görülməsi üçün araşdırma materialları Qəbələ rayon Prokurorluğuna göndərilib.

Ekologiya və Təbii Sərvətlər nazirliyinin Mətbuat katibi İradə İbrahimova Axar.az-a açıqlamasında bildirib ki, satmaq məqsədilə ovlanan ayı Azərbaycanın Qırmızı kitabına düşmüş qonur ayı olub. İ.İbrahimova bildirib ki, qonur ayının ovlanması qəti qadağandır.

Həmin şəxsə nə qədər cəza verilməsinə gəlincə isə, nazirlikdən bildirilib ki, məsələyə hüququ qiymət verilməsi üçün prokurorluqda araşdırma aparılır.