Son illər ərzində Naxçıvanda iqtisadiyyatın bütün istiqamətləri üzrə yüksəliş baş verir. Yerli istehsal artır, ixrac potensialı genişlənir və büdcənin yerli gəlirləri də müvafiq olaraq artır.

Bu sözləri Axar.az-a açıqlamasında professor Fikrət Yusifov Prezident İlham Əliyevin Naxçıvan Muxtar Respublikası Ali Məclisinin sədri Vasif Talıbovu qəbul edən zaman muxtar respublikanda növbəti illərdə yerli gəlirlərin artırılması istiqamətində işlərin aparılması barədə fikirlərini şərh edərkən deyib. O bildirib ki, Naxçıvanın gəlirlərini artırmağın bir neçə yolu var:

“Naxçıvanla bağlı danışarkən unutmaq olmaz ki, Azərbaycanın bu mühüm strateji əhəmiyyətli bölgəsi bu gün də blokada şəraitindədir. Bu gün Naxçıvan öz gözəlliyi ilə nümunəvi bir bölgəyə çevrilib. Muxtar Respublika həyatının bütün sahələrində kifayət qədər inkişaf mövcuddur və bunu danmaq mümkün deyil. Lakin bir həqiqət var ki, Naxçıvan iqtisadiyyatının inkişaf sürəti ilə onun ümumi inkişaf sürəti arasında müəyyən bir uyğunsuzluq mövcuddur. Bu uyğunsuzluğu aradan qaldırmağın bir neçə yolu var. Onlardan biri Türkiyə və İranla həmsərhəd olan Naxçıvanda azad iqtisadi zonanın yaradılması ola bilər. Naxçıvan bütün parametrləri ilə belə bir zonanın yaradılması üçün olduqca əlverişli bölgədir. Əgər bu addım atılarsa, Naxçıvan nəinki öz gəlirləri ilə öz xərclərini örtə bilər, o, hətta dövlət büdcəmizin gəlirlərinin formalaşmasında belə öz sözünü demək imkanı qazanar”