"Akkord" şirkətinin Bakıxanov qəsəbəsindəki binalarında qarajlar sakinlərə satılır.

Axar.az-a məktub göndərən bir qrup sakin qeyd edir ki, "Uğur-2" kompleksinin 8 yaşayış binasında avtomobil qarajları istifadəyə verilmir. Sakinlərin sözlərinə görə, qarajlar satışa çıxarılıb və qiymətlərin fantastik bahalığına görə kimsə almaq istəmir.

"Bu binaların sakinləriyiksə, qarajları da mənzil sahiblərinin istifadəsində olmalıdır. Qaraj dükan, ya obyekt deyil ki satasan? Heç bir qanuna istinad olunmadan bu addımı atırlar. Belə çıxır ki, qarajlar bu binaya və burada yaşayanlara aid deyil. Artıq 8 binada 1800 mənzil var ki, təqribən neçə avtomobilin binaların həyətində dayandığını təsəvvür etmək olar. Kompleksin elə bir geniş sahəsi də yoxdur ki, maşınlar rahat hərəkət edə bilsin".

Sakinlər yazırlar ki, kompleksin həyətində sıxlıq yaranıb: "Maşınlar girib-çıxa bilmir. Hətta binaların dörd yanı maşınla mühasirəyə alınır. Yaxınlıqdakı şadlıq evinə qədər maşın karvanı uzanır".

Məsələ ilə əlaqədar Akkord şirkətlər qrupununun mətbuat xidmətinin əməkdaşı Bəhruz Əliyev Axar.az-a açıqlamasında xəbəri təkzib etdi. Onun szölərinə görə, qarajlar satılmır:

""Uğur 2" yaşayış kompleksində olan qarajlar hazırda satışa çıxarılmayıb. Qarajların hələlik istifadəyə verilməməsinin səbəbi tamamlama işlərinin yekunlaşmamasıdır. Bu məsələ həll edildikdən sonra qaraj istifadəyə veriləcək".