"Qanunvericiliyə ediləcək dəyişikliklə icbari sığortası olmayan sürücünün avtomobili hərəkətdən kənarlaşdırılaraq cərimə meydançasına qoyulacaq".

Axar.az xəbər verir ki, bu açıqlama ilə yol hərəkəti üzrə ekspert Ərşad Hüseynov çıxış edib. O, hər bir sürücünü icbarı sığorta məsələsində problem yaşamamaları üçün diqqətli olmağa çağırıb:

"Yəqin ki, sürücülərimiz heç kəsin icbari sığortadan yayına bilməməsi üçün dalbadal atılan addımlardan xəbərdardırlar. Bu istiqamətdə ilk sərt addım artıq atılıb. 20 iyun 2014-cü ildə icbari sığortanın olmamasına görə sürücülərə tətbiq olunan cərimə 10 manatdan 50 manata qaldırılıb. İkinci addım icbari sığorta ilə bağlı elektron məlumat bazasının DYP-nin informasiya sistemi ilə inteqrasiyasıdır. Bu inteqrasiyadan sonra istənilən DYP postunda və ya patrul maşınında olan DYP əməkdaşı yolda hərəkət edən maşının icbari sığortasının olub-olmadığını biləcək. Bu texniki məsələ artıq tam həll olunmaq üzrədir. Üçüncü addım isə daha maraqlı olacaq. İcbari sığortası olmayan sürücünün avtomobili hərəkətdən kənarlaşdırılaraq cərimə meydançasına qoyulacaq. Yalnız icbari sığota bağlandıqdan və 50 manatlıq cərimə ödəndikdən sonra avtomobil sahibinə qaytarılacaq. Bunun üçün qanunvericiliyə dəyişiklik edilməsi çox yaxın gələcəyin işidir (məndə olan məlumata görə, artıq layihə hazırdır). Odur ki, icbari sığorta məsələsinə diqqəti artırın".