Bərdədə ölümlə nəticələnən ağır yol qəzası baş verib.

ANS press-in məlumatına görə, hadisə rayonun Mehdili kəndi ərazisində qeydə alınıb.

Mingəçevir Bəhramtəpə magistralının 69-cu kilometrliyində "Ford" və VAZ-2106 markalı avtomobilər toqquşub. Zərbənin təsirindən "Ford" markalı maşın yoldan çıxaraq kənara aşıb.

Bərdənin Hacıbəyli kənd sakini 44 yaşlı Azər Məmmədovun idarə etdiyi VAZ-2106 markalı avtomobildəki sərnişin 70 yaşlı Aslan Məmmədov hadisə yerindəcə dünyasını dəyişib. Aralarında azyaşlı da olan 4 nəfər yaralı hadisə şahidlərinin köməkliyi ilə Bərdə MRX-na çatdırılıb.

Xəstəxanadan əldə etdiyimiz məlumata görə, "Ford"un sürücüsü, rayonun Şirvanlı kənd sakini Fəxri Əliyevin vəziyyəti ağırdır. 13 yaşlı Fuad Məmmədovun ayağı sınıb.

Digər yaralılar, Azər Məmmədov və Hicran Məmmədovaların vəziyyəti kafi qiymətləndirilir.

Qəzaya "Ford"un sürücüsünün ötmə əməliyyatını düzgün yerinə yetirməməsinin səbəb olduğu bildirilir.

Faktla bağlı araşdırma aparılır.