21:23

Tərtər rayon Polis Şöbəsinin müvəqqəti saxlama təcridxanasında saxlanılan şəxs intihar edib.

Tərtər rayon Polis Şöbəsindən verilən xəbərə görə, narkotik maddələrin qanunsuz dövriyyəsində təqsirli bilinən Ağdam rayon sakini, 1982-cil il təvəllüdlü Dünyamalıyev Səbuhi Zamin oğlu saxlanıldığı kamerada özünü asıb.

Hadisədən dərhal sonra rayonda vəziyyətin gərginləşdiyi barədə xəbər yayılıb. APA xəbər verir ki, S.Dünyamalıyevin qohumlarının bir qrupu Tərtər rayon Polis Şöbəsinə gəlib, onlar yaxınlarının özünə qəsd etməsinə qəzəbli olduqları üçün incident yaranıb. İnsidentdə polislər də daxil olmaqla bir neçə nəfər müxtəlif dərəcəli bədən xəsarəti alıb. Polis şöbəsinin binasına da zərər dəyib.

Tərtər Rayon Polis Şöbəsinin rəisi Rauf Məcidov isə Tərtərdə gərginlik olması xəbərini təkzib edib: "Tərtərdə vəziyyət tam nəzarətdədir və rayon polisi həmişəki iş rejimi ilə işləyir. Rayonda tam sakitlikdir".

Rəisin sözlərinə görə, Ağdam rayon sakini, 1982-cil il təvəllüdlü Dünyamalıyev Səbuhi Zamin oğlunun saxlanıldığı kamerada özünü asması faktı ilə bağlı araşdırmalar aparılır. Araşdırma bitəndən sonra bu barədə əlavə məlumat veriləcək.

Şöbə rəisi bildirib ki, etiraz edən Səbuhi Dünyamalıyevin yaxınları ilə söhbət aparılıb, bundan sonra onlar sakitləşiblər: "Dünyamalıyevin qohumlarına hər şeyin qanun çərçivəsində araşdırılacağı bildirilib".

R.Məcidov rayonda iğtişaş baş verməsi barədə bəzi saytlarda yazılanların həqiqəti əks etdirmədiyini qeyd edib.