Millət vəkili Fazil Mustafa bu gün Fələstinin Azərbaycandakı səfiri Nasser Karemlə görüşüb.

Axar.az xəbər verir ki, bu məlumatı deputat öz Feysbuk hesabında paylaşıb.

O, bölgədəki ümumi vəziyyətin müzakirəsini və görüşdən məmnunluğunu belə ifadə edib:

"Bu gün Fələstinin Azərbaycandakı səfiri cənab Nasser Karemlə onun dəvəti ilə səfirlikdə səmimi bir görüşümüz oldu. Görüşdə Azərbaycan-Fələstin münasibətləri, rəsmi Azərbaycanın Fələstin xalqına göstərdiyi siyasi və humanitar dəstək, Dağlıq Qarabağ məsələsində rəsmi Fələstinin Azərbaycanın haqlı mövqeyini dəstəkləməsi və bölgədəki vəziyyət müzakirə olundu. Qeyd edim ki, Azərbaycan İsraillə dostluq münasibətindədir və bununla yanaşı Fələstinin də Azərbaycanda səfirliyinin olması müsbət haldır. Azərbaycan Prezidenti İlham Əliyevin Fələstin məsələsinə xüsusi diqqətlə yanaşması və beynəlxalq platformada onların haqlı tələblərini dəstəkləməsi sevindirici haldır. Görüşdə parlamentlərarası əməkdaşlığın da yaranması məsələlərinə toxunuldu".