BP-Azərbaycan şirkətində kütləvi ixtisarlar etirazlara səbəb olub. İşlərini itirmiş bəzi əməkdaşlar "BBC Azərbaycanca"ya prosesin cəmi bir neçə gün ərzində başa çatdığını bildiriblər.

Azərbaycan qanunvericiliyinə əsasən ixtisarlara görə əmək müqaviləsi ləğv olunan işçilərə azı iki ay əvvəl rəsmi xəbərdarlıq verilməlidir. Amma bütün prosedurlar təxminən üç gün davam edib.

"10 dəqiqə əvvəl ixtisara düşdüyümü dedilər. Bəlkə də kimsə kiməsə deyirdi, amma məndə bu barədə məlumat yox idi və gözləmirdim də", - şirkətin sabiq işçisi Emin Məmmədov deyib.

Şirkətdən isə bildirilib ki, əmək müqavilələrinə xitam veriləcək işçilərin hər birinə ixtisarla bağlı ən azı iki ay əvvəldən xəbərdarlıq edilib.

Neftçilərin Hüquqlarının Müdafiə Təşkilatının rəhbəri Mirvari Qəhrəmanlı deyib ki, ixtisarlar barədə bildirişlər təzə verilib deyə hələ ki, ixtisarlar haqqında məhkəmə şikayətləri başlamayıb.

Neftçilərin Hüquqlarının Müdafiə Təşkilatının proqnozlarına görə, 2015-ci ilin sonunadək "BP-Azərbaycan"da daha çox ixtisarlar ola bilər.

2014-cü ilin sonuna olan məlumata görə, "BP-Azərbaycan"da daimi işçilərin ümumi sayı 3467 idi: bunların 2992 nəfəri yerli, 475 nəfəri isə xarici vətəndaş olub.