Bakı beynəlxalq hava limanina marşrut xətti açıla bilər.

Axar.az-ın xəbərinə görə, Avropa Yay Oyunlarına qədər bu məsələnin həllini tapacağı gözlənilir. Turistlərin paytaxta axını olacağını nəzərə alaraq, xeyli vaxtdır ki, bu istiqamətdə ləğv edilən ictimai nəqliyyatın bərpası planlaşdırılır.

Yarışmanın keçiriləcəyi olimpiya stadionun da sözügedən trayektoriyada yerləşməsi aeroporta marşrut açılmasını şərtləndirib.

Millət vəkili Zahid Oruc da "Analitik.az" saytına açıqlamasında sözügedən problemlə bağlı narahatlığını dilə gətirib. Deputat deyib ki, dünyanın başqa ölkələrində hava limanına işləyən nəqliyyat vasitələri - metro, avtobus var, amma bizdə yoxdur:

"Yalnız şəxsi avtomobillər və taksilərdir. Şübhəsiz ki, bu, maddi imkanları aşağı olan insanların büdcəsinə mənfi təsir göstərir. Məsələ ilk növbədə burada nəqliyyat sistemində rəqabətlilikdir.
İkincisi də bu bir standart, norma və mədəniyyətin ayrılmaz hissəsidir. Nə üçün bizdə hava limanında taksilər üzərində siyasət qurulub, bunu anlamaq və qəbul etmək çox çətindir. Bu, həm də beynəlxalq hava limanıdır. Sadəcə, milli status daşımır. Ora gələn çoxlu sayda insan var. Bəzən də tranzit daşımalar oradan keçir".

Deputat hökumətin bu problemi yaxın zamanlarda həll edəcəyinə əmin olduğunu bildirib.