Bakının mərkəzində daha bir tarixi bina arxivə qovuşub. Paytaxtın Qoqol küçəsi-4 ünvanında, Malakan bağı yaxınlığındakı qədim tikili sökülüb.

Axar.az əməkdaşının verdiyi xəbərə görə, binanın söküntüsü çoxdan nəzərdə tutulurdu, amma yubanırdı. Şəhərin tarixi binalarından biri olan bu tikili hazırda yarımsökülü vəziyyətdədir. Onun yerində nə tikiləcəyi açıqlanmır. Yaxınlıqda partlamış su borularını təmir edən fəhlələr müxbirimizə hələ nə inşa olunacağının dəqiqləşmədiyini deyiblər. Ehtimal olunur ki, ərazidə ticarət mərkəzi, yaxud restoran fəaliyyət göstərəcək.