Bakı Dövlət Universitetinin Mülki hüquq kafedrasının dosenti Sərvər Süleymanlının dərs dediyi "Sabah" qrupundakı fəaliyyəti dayandırılıb.

Bu barədə Axar.az-a S.Süleymanlının tələbələri məlumat veriblər. Onların sözlərinə görə, əmək müqaviləsi qüvvədə olduğu halda maraqlı şəxslərin sirafişi ilə S.Süleymanlının mülki hüquq dərsinə girməsi dondurulub. Hazırda "Sabah" qrupunun tədris planında mülki hüquq dərsləri olsa da, tələbələr S.Süleymanlının uzaqlaşdırılması səbəbilə dərsdən məhrum olublar.

Məsələ ilə əlaqədar Bakı Dövlət Universitetinin mətbuat xidməti və informasiya şöbəsindən Axar.az-a bildirdilər ki, "Sabah" qruplarında dərs deyən müəllimlərin seçilməsi və fəaliyyətlərinin dayandırılması Təhsil Nazirliyinin səlahiyyətindədir.

Təhsil Nazirliyinin mətbuat xidmətinin rəhbəri Cəsarət Valehli isə bu məsələ ilə bağlı sualımıza yalnız araşdırma aparıldıqdan sonra cavab veriləcəyini qeyd etdi. Ünvanladığımız sualdan iki gün ötməsinə baxmayaraq, hələlik nazirliyin rəsmi cavabı yoxdur.