Ötən gün Mütəşəkkil Cinayətkarlıqla Mübarizə Baş İdarəsi və Yevlax polisinin həyata keçirdiyi əməliyyat-axtarış tədbirləri nəticəsində yaxalanan silahlı dəstə üzvlərinin adı açıqlanıb.

Axar.az xəbər verir ki, həbs olunan Yevlax şəhər sakinləri Əli Nəbiyevdən 1,5 kiloqram marixuana, Səbuhi Məmmədovdan 1,2 kiloqram marixuana, əvvəllər məhkum olunmuşlar - Əlövsət Musayevin evindən 2 ədəd qumbara və 1,1 kiloqram marixuana, Elxan Hüseynovun evindən TT markalı tapança və 2 qram heroin, Əsəd Məmmədovun evindən AKSU markalı silah, 2 ədəd qumbara, 29 ədəd avtomat patronu və 1,6 qram heroin, Mövsüm Musayevin evindən 2,4 kiloqram marixuana, Arif Bəkirovun evindən 2,2 kiloqram marixuana və 11 qram tiryək aşkar edilib.

Yerli sakinlərdən əldə etdiyimiz məlumata görə, dəstənin başçısı Əlövsət Musayevdir. Əvvəllər bir neçə dəfə məhkumluq həyatı yaşayan və 70-ə yaxın yaşı olduğu bildirilən Ə.Musayevin bir daha azadlığa çıxmayacağı ehtimal edilir.

Xatırladaq ki, cinayətkar silahlı dəstə sahibkarlardan hədə-qorxu ilə pul tələb edirlərmiş.

Hazırda həbs olunanlar Mütəşəkkil Cinayətkarlıqla Mübarizə Baş İdarəsinə gətirilib.