Avropa Yay Oyunları günlərinə qədər standartlara cavab verməyən marşrutlar xətdən kənarlaşdırılacaq.

Axar.az-ın xəbərinə görə, texniki cəhətdən nasaz avtobuslar xəttə buraxılmayacaq, sürücülər isə spesifik geyimdə olacaq. Bu tələbləri yerinə yetirməyən sahibkarın ictimai nəqliyyatda marşrut xətti ləğv olunacaq.

Nəqliyyat Nazirliyinin Dövlət Avtomobil Nəqliyyatı Xidmətinin Bakı Sərnişin və Yük Daşımalarının Təşkili İdarəsinin rəis müavini Əmrah Cəfərov da "Trend"ə deyib ki, nəqliyyat vasitələrinə baxış keçiriləcək.

Ə.Cəfərovun sözlərinə görə, onlara bütün çatışmazlıqların aradan qaldırılması üçün martın 6-dək vaxt verilib. Sonra nəqliyyat vasitələri idarədə təşkil olunmuş komissiya tərəfindən bir-bir yoxlanılacaq.

Avtomobillərin xarici görünüşü, içi, oturacaqları, işləmə mexanizmi və s. detallarınadək gözdən keçiriləcək. Ə.Cəfərov bildirib ki, bəzi ortatutumlu avtomobillərin vəziyyəti onları qane etmir və xəttə buraxılması qəti şəkildə dayandırılacaq.