Binəqədi rayonunda neft şirkətinin ərazisində inşa edilmiş evlərin sənədləşməsi mümkün deyil.

Axar.az-a verilən xəbərə görə, rayonun Rəsulzadə qəsəbəsində və Novxanı istiqamətində tikilmiş ARDNŞ-yə məxsus torpaq sahəsində tikilən evlər artıq plana salınıb.

Həmçinin, Sulutəpə və Xocahəsən qəsəbələrində də qanunsuz tikililər mövcuddur. Məhkəmənin burada 1000-dən artıq evin sökülməsi barədə qərarı hələlik icra olunmayıb. Binəqədi rayon icra başçısı Xaləddin İsgəndərov da 2014-cü ilin yekunlarına həsr edilmiş yığıncaqda bildirib ki, bu evlərin əksəriyyəti 2006-2007-ci illərdə tikilib.

Xatırladaq ki, Binəqədi rayonu ərazisinin 51%-i ARDNŞ-yə məxsusdur. Həmin torpaqlar müvafiq qurum tərəfindən 2005-ci ildən uzunmüddətli sazişlə "Binəqədi Oyl" şirkətinə icarəyə verilib.