Fiziki qüsurlu və əlil şəxslər üçün yeni iş yerləri təklif edilir.

Axar.az xəbər verir ki, "119 Məlumat və Xidmət Mərkəzi" məhdud fiziki imkanlı insanların cəmiyyətə inteqrasiyası üçün belə bir addım atıb. Mərkəz bu problemin həlli məqsədilə fiziki qüsuru olan şəxslərə operator vəzifəsində iş yerlərinin açılmasını elan edir.

Mərkəzdən Axar.az-a bununla bağlı verilən əlavə məlumata görə, işləmək istəyən fiziki qüsurlu şəxslərin müraciəti artıq başlayıb. Mərkəzdən bildirirlər ki, müraciət edənlərdən əksəriyyəti oğlanlardır:

"Yaş məhdudiyyəti qoyulmayıb. Əlilliyi olan və istənilən yaşda olan şəxslər bizə müraciət edə bilərlər. Hazırda iş üçün müraciət edənlər adətən 25-40 yaş arasında olan şəxslərdir. Əmək haqqı cavab verilən zənglərin sayından asılı olaraq təyin olunacaq. Hələlik bu barədə dəqiq məlumat vermək bir qədər çətindir".

Əlilliyi olan şəxslərin görəcəyi iş isə daxil olan zənglərin cavablandırılmasıdır. Bu da xüsusi proqram vasitəsi ilə həyata keçiriləcək ki, onlar bu işi evdən də apara biləcəklər:

"İşə başlamazdan əvvəl isə bizim məşqçilər tərəfindən treninqlər keçiriləcək".