Fevralın 12-də Lənkəranın Nərimanabad qəsəbəsində qayıqla balıq ovuna çıxan iki nəfər itkin düşüb.

Axar.az-a bölgədən verilən məlumata görə, qəsəbə sakini 22 yaşlı İbrahim Məmmədov və 32 yaşlı Ceyhun Mahmudov dənizə çıxıblar və geri qayıtmayıblar. Havanın küləkli olduğunu görən o biri balıqçılar geri qayıtsalar da, onlar dənizdə qalıblar.

İtkin düşmüş balıqçıların axtarışına motorlu qayıqlarla yanaşı, Fövqəladə Hallar Nazirliyinin aviasiya dəstəsi də cəlb olunub. Havanın küləkli olması xilasedicilərin işini çətinləşdirib. Xilasedicilərlə yanaşı, qəsəbə sakinləri də axtarışda iştirak edirlər. Axtarışlar davam edir.

Qeyd edək ki, hər il Lənkəranda balıqçılar dənizdə itkin düşür. Nərimanabad rayonun balıqçılar qəsəbəsi kimi tanınır. Dörd yanı su ilə əhatə olunmuş qəsəbə əhalisinin yeganə dolanışıq mənbəyi balıqçılıqdır. Bir neçə il əvvəl balıq ovuna məhdudiyyətə görə qəsəbədə iğtişaşlar baş vermişdi.