Daxili İşlər naziri, general-polkovnik Vilayət Eyvazovun Bakı şəhər Baş Polis İdarəsinin Dövlət Yol Polis İdarəsinin (BDYPİ) bütün şəxsi heyətini sərəncama götürməsi qeyri-adi bir şey deyil. Bu, aparılan islahatların davamı ola bilər.

Bu sözləri Axar.az-a açıqlamasında yol-nəqliyyat eksperti Elməddin Muradlı deyib. O bildirib ki, belə olan halda polis alayı öz vəzifəsinin icrasına davam edir:

“İdarənin sərəncama götürülməsi o demək deyil ki, BDYPİ-nin bütün heyəti işdən azad olunub. Yol polislərinin hamısı hər gün işə gəlir və işinə davam edir. Ola bilsin ki, müəyyən dəyişikliklər edilsin. Bildiyim qədərilə, idarə rəisi, müavinləri, alay komandiri, alayın şəxsi heyəti yerindədir və xidmət göstərməyə davam edirlər. Çünki yol polisi elə bir sistemdir ki, hərəkətin dəyişikliyinə və təhlükəsizliyinə nəzarət vaxtlı-vaxtında olmalıdır. Sadəcə olaraq, idarə heyətinin kabinetdə oturan əməkdaşları sərəncamdadır. Yaxın günlərdə bu məsələ öz həllini tapacaq”.

Qeyd edək ki, Daxili İşlər naziri, general-polkovnik Vilayət Eyvazov Bakı şəhər Baş Polis İdarəsinin Dövlət Yol Polis İdarəsi ilə bağlı əmr verib. Əmrə əsasən, idarənin bütün şəxsi heyəti sərəncama götürülüb.