Azərbaycanda vətəndaşların əmək hüquqlarının ən çox pozulduğu şirkətlərin siyahısı açıqlanıb. Prezidenti Administrasiyasının Sənədlərlə və vətəndaşların müraciətləri ilə iş şöbəsinin müdiri Süleyman İsmayılovun AzərTAc-da dərc olunmuş məqaləsində həmin firmaların adları çəkilib.

Axar.az xəbər verir ki, əmək mübahisələri ilə əlaqədar müraciətlərdə bir sıra özəl şirkətlər tərəfindən əmək müqavilələrinin bağlanmaması, nəticədə vətəndaşlara iş stajı hesablanmaması daha çox narazılıq doğurur. Bu hallara yol verən şirkətlərdən "Enermech", "Tatlı" şirkətləri, "Det Al.Alüminium" MMC,"Caspian Sea", "TRUSİ-SS" adları hallanıb.

"Akkord" Tikinti Sənaye İnvestisiya Korporasiyası şirkətindən də müraciətlər olduğu bildirilir. Bu şirkətlərin içərisində ən çox diqqət çəkən iri yol-tikinti layihələri həyata keçirən "AzVirt" MMC-dir. Şirkət Serbiya və Rumıniyada magistral yolların çəkilişini həyata keçirib.

"AzVirt" MMC 1995-ci ildə yaradılıb. Müəssisənin əsas fəaliyyət sahəsi avtomobil yollarının və hava limanlarının uçuş-eniş zolaqlarının tikintisi və təmirindən, yol-inşaat materiallarının istehsalından ibarətdir.

Xatırladaq ki, 2012-ci ilin mayında bu şirkətin iş icraçısı Akim Əfəndiyev Şamaxının Nağaraxana kəndində qətlə yetirilib. Onu özünə məxsus bağ evində qətlə yetirib, sonra isə evə od vurublar. Firmanın rəhbərinin Kamil adlı şəxs olduğu deyilir.