Daşkəsənin icra başçısı Əhəd Abıyevin bir müddət əvvəl qaldırdığı problem həllini tapıb.

Axar.az-ın xəbərinə görə, icra başçısı rayona aid örüş sahələrinin qonşu bölgələrə verilməsindən narazılıq edərək Nazirlər Kabinetinə müraciət göndərib.

Otlaq sahələrindən düzgün istifadə olunmaması və örüş sahələrinin Daşkəsənin tərkibinə qaytarılması barədə Baş nazir Artur Rasizadəyə müraciətdən sonra qərar verilib.

Prezidenti Administrasiyasının Sənədlərlə və vətəndaşların müraciətləri ilə iş şöbəsinin müdiri Süleyman İsmayılov qeyd edib ki, daxil olan bəzi şikayətlərdə vətəndaşlar şəxsi təsərrüfatlarında saxladıqları mal-qara üçün örüş yerlərinin ayrılmamasından narazılıq edib.

Ümumi örüş yerlərindən başqa məqsədlər üçün istifadə edilməsi, onların yerli bələdiyyələr və icra nümayəndələri tərəfindən kənar şəxslərə verilməsi, həmin ərazilərdə kənd təsərrüfatı bitkilərinin əkilməsi barədə məlumat verilib. Siyahıda Zaqatala, Sabirabad, Salyan, Tovuzla yanaşı Daşkəsənin də adı çəkilir.

Ə.Abıyev musavat.com-a müsahibəsində Daşkəsənin örüş sahələrinin qonşu rayonların tərkibində olduğunu vurğulamışdı.