Deputatlığa namizədlərin təbliğat-təşviqat kampaniyası ilə bağlı Mərkəzi Seçki Komissiyasına hər hansı şikayət daxil olmayıb.

Bunu Axar.az-a açıqlamasında Mərkəzi Seçki Komissiyasının katibi Mikayıl Rəhimov deyib. O bildirib ki, posterlərin cırılması ilə bağlı namizədlərin şikayəti olarsa, dərhal hüquq-mühafizə orqanlarına müraciət etsinlər:

“Bizə namizədlər tərəfindən heç bir şikayət daxil olmayıb. Ola bilər ki, onlar qarşılaşdıqları problemlərlə bağı Dairə Seçki Komissiyasına (DSK) müraciət ediblər. Onların vəzifələridir ki, bu kimi hallarla bağlı təcili tədbirlər görsünlər. Bununla yanaşı şəkilləri cırılan namizədlər təcili polisə müraciət etməlidir. Heç kimin kiminsə seçki plakatlarını və materiallarını cırmaq və tullamaq hüququ yoxdur, bu, məsuliyyət yaradır. Namizədlərin bu və ya digər məsələlərlə bağlı şikayətləri olarsa, Dairə Seçki Komissiyasına (DSK) müraciət edə bilərlər. DSK daxil olan müraciətlərə və şikayətlərə operativ reaksiya verəcək”.