Fevralın 9-da keçiriləcək parlament seçkilərində namizəd olan şəxslər ölkənin müxtəlif bölgələrində təbliğat-təşviqat kampaniyası aparırlar. Bu kampaniya əsnasında ən çox diqqət çəkən məqamlardan biri də namizədlərin baş çəkdikləri kənd və qəsəbələrin adlarıdır. Bu adlar bəzən sosial şəbəkə istifadəçiləri arasında müzakirə edilir və sözügedən toponimlərin dəyişdirilməsinin zəruriliyi haqqında fikir səsləndirilir. Sosial şəbəkə istifadəçiləri daha çox Neftçalanın Bankə qəsəbəsinin, Aşağı Surra və Tovuzun Dönük qırıqlı kəndinin adının dəyişdirilməsini təklif edirlər.

Bəs namizədlər bu haqda nə düşünürlər?

Mövzu ilə bağlı Axar.az-a danışan xalq şairi, 61 saylı Neftçala seçki dairəsindən deputatlığa namizəd Sabir Rüstəmxanlı bildirib ki, Bankə qəsəbəsinin sakinləri kəndin adının dəyişdirilməsi barədə müraciət etməyib:

“Bir neçə gün öncə Bankə qəsəbəsində seçicilərlə görüş keçirdik. Görüşdə qəsəbənin adının dəyişdirilməsi ilə bağlı hansısa bir təklif və ya müraciət olmadı. Hazırda bizim də bu məsələ ilə əlaqədar planımız yoxdur. Əgər sakinlərin müraciəti olarsa, əlbəttə bu barədə aidiyyəti qurumlar qarşısında məsələ qaldıra bilərik”.

Seçicilərinin bir qismi Aşağı Surra kənd sakinləri olan 60 saylı Salyan-Neftçala seçki dairəsindən deputatlığa namizəd Fəzail Ağamalı da kəndin adının dəyişdirilməsi barədə təklif olmadığını bildirib:

“Aşağı Surra kəndində həm deputat olduğum müddətdə, həm də təbliğat-təşviqat kampaniyası çərçivəsində çoxsaylı görüşlərim olub, lakin sakinlər tərəfindən kəndin adının dəyişdirilməsi ilə bağlı hansısa bir müraciət olmayıb. Neftçalada iki Surra kəndi var –Aşağı Surra və Bala Surra. Adətən toponimlər burada yaşayan tayfaların və yaxud da kəndin əsasını qoyan hansısa nəslin adı ilə bağlı olur. Bəzən də kəndlər ona oxşar tarixi yerlərin sinonimi ilə adlandırılır. Hesab etmirəm ki, “surra” adı hansısa narahatlıq yaradır”.

Dönük Qırıqlı kəndi barədə danışan 105 saylı Tovuz seçki dairəsindən deputatlığa namizəd Qənirə Paşayeva isə bildirib ki, ad dəyişilməsi üçün kənd camaatı tərəfindən müraciət daxil olmalıdır:

“Hansısa kəndin adının dəyişdirilməsi asan məsələ deyil. Hər şeydən əvvəl tarixi köklər araşdırılmalı, təhrif olunduğu təsdiqlənməli və kənd sakinləri tərəfindən daxil olan müraciətlər nəzərə alınmalıdır”.